tée cele anthiene Exaudi nos Domine atout le vers et le Gloria. Après le Kyriel, dist l’oroison li evesques Leons, et quant tuit furent assis, Jehans evesques d’Areste, messages l’Apostoile, lut devant touz un libelle dont la sentence estoit sanz raison et sanz auctorité. Après, se leva Huedes, li evesques de Biauvez[1], et lut une cedule que li messages l’Apostoile et Ensegises, arcevesques de Sanz, et il meismes, avoient faite et ditée sanz l’asentement du concile, en laquele aucun chapitre estoient contenu qui entre aus meismes estoient contraire et descordable. Et pour ce, ne furent pas ci mis, que il n’avoient ne raison ne auctorité.
Derechief, fu meue question de la primacie Ensegise, l’arcevesque de Sanz ; et quant li empereres et li messages l’Apostoile en orent assez parlé et desputé entre les prelaz, si n’en fu-il plus que il en ot esté à la premiere jornée du concile. Adonques se leverent Pierres, arcevesques de Phorosinpré et Jehans li Toscans, en la chambre le roi s’en alerent et amenerent ou concile l’empererriz Richeut[2] toute coronée ; en estant se tint delez l’empereor. Lors se leverent tuit li prelat en estant en leur ordres[3]. Jehans li Toscans, et li evesques Leons commencierent lors loenges et grâces à Dieu que li evesques Leons accompli par une oroison ; si departi atant li conciles. Aus messages l’Apostoile dona li empereres dons et presenz, congié pristrent atant et retornerent à Rome. Ovec eus, envoia li em-
