boient les eglises et les pelerins, et essiloient[1] les povres genz ; les gries et les maus que cil daloial faisoient ne porent plus soufrir li evesques de Clermont[2] et cil dou Pui[3], ne li abbé dou païs. Et por ce que il ne pooient contrester à iaus ne à lor force, orent consel que il s’en vendroient clamer au roi Loois. A li s’en vindrent donques, et li prierent en Dieu que il mait consel à amender les maus que cil tyrant faisoient à Dieu et à sainte Eglise. Et li douz rois et debonaires, quant il ot oïes ces complaintes des daloiautez que cil tyrant faisoient, asembla son ost, hastivement chevaucha en ces parties toz encoragiez de vanchier la honte et le domache des eglises[4]. Si estoit trop grief chose d’amprendre guerre contre tex genz qui estoient riche et asazé[5] en lor païs, et à merveles bien garni d’avoir et de genz. A iaus se combati en champ, et par l’aide Damedieu, cui partie il defendoit, li avint si granz honors que il les desconfit et prist en champ de batale et les amena ovoc soi en chaitivoisons[6], et les tint en prisom tant com il li plout, et li jurerent à la parfim que il cesseroient des maus que il avoient acostumez à faire. Bons ostages donerent, atant furent delivré[7].
- ↑ Essiloient, dépouillaient.
- ↑ Étienne VI de Mercœur, évêque de Clermont de 1151 au 26 janvier 1169.
- ↑ Pierre IV, évêque du Puy de 1159 à 1189.
- ↑ D. Vaissete rapporte cette expédition de Louis VII en Auvergne à l’année 1165 (Hist. de Languedoc, nouv. éd., t. VII, p. 8-10).
- ↑ Asazé, pourvus de tout.
- ↑ Chaitivoisons, captivité.
- ↑ Les comtes d’Auvergne et du Puy étaient déjà hors de prison en 1167 (D. Vaissete, op. cit., t. VII, p. 9).
