baronnie estoit la contehez de Roches[1] qui commençoit d’une forest que l’on apele Marriz et duroit devers Orient outre le flum d’Eufrate juques en la paienime. Cit IIII prince estoient grant home et puissant. Quant il oïrent parler prumierement de la venue l’emperaor d’Alemagne et dou roi de France, chacuns d’aus ot grant esperance que par l’aide d’aus peut bouter ses enemis arrieres et les termes de son pooir metre bien avant, car n’i avoit celui d’aus toz qui n’aut en sa marche bien près de lui Turs et bones citez forz que il desirroient moult à conquerre se il pooissent. Por ce, estoient tuit en grant porpens[2] por aus acroitre et chacuns avoit envoiez messages, lettres et riches joiaus à ces II granz segnors et aus autres barons maimes por atraire vers soi. Li rois Baudoins i cuidoit avoir gregnor droit, en ce que li rois de France venit vers lui, que li autre n’avoient[3], car il estoit meuz de son païs por visiter les sains liex de Jerusalem[4]. D’autre part, li empereres estoit ja là qui l’atendoit ; si estoit droiz que li rois deust plus tost aler là que demorer ailors, por son pelerinage parfaire et por prendre consel entre li et l’emperaor des besognes de la crestienté. Totes voies, por ce que il se doutoit que li autre baron ne le retenissent, envoia-il à li le patriarche, si com ge vous ai dit, qui moult bien li monstra par maintes raisons
- ↑ Roches ou Rohès, l’ancienne Édesse.
- ↑ Porpens, pensée.
- ↑ « Pour trois causes. Premierement pour une singuliere affinité à cause de paix que il se disoit avoir au roy de France, car il estoit nez de Flandres, qui est un des grans membres du royaume de France. Secondement » (royal ms. 16 G VI, fol. 318 vo, en note).
- ↑ « Tiercement » (Ibid.).
