trage ne leur feust fait ; et voloit que aussi bien feust droit et raison au povre comme au riche. Nul ne porroit penser comme le menu pueple de Paris en estoit corroucié, et disoient entr’eus : « Sire Dieus, que voulez-vous à vostre pueple. Pourquoi nous tolez-vous celui qui nous deffendoit et gardoit en bonne pès, le souverain prince de toute justice bonne ? » Lors lessierent tuit li menestrel besongne à faire et coururent homes et fames aus yglises et firent prieres et oroisons, et donnerent aumosnes aus povres o grant devocion, que Nostre Sires vossit ramener le roy à santé.
Ceste nouvele courut par tout le païs, tant que le pape Innocent le sot qui estoit à Lyons seur le Rosne, et li dist l’en certainement que il estoit trespassé. Si en fu mout dolent et corroucié, et ce n’estoit pas merveille, car l’eglise de Romme n’avoit autre deffendeeur en la tempeste et en la douleur où elle estoit contre l’empereour Federic. Si comme ceste dolente nouvele couroit par le païz, Cil qui commande aus vens et à la mer et à touz elemenz et les torne quel part qu’il veut, fu esmeuz de pitié, car il volt que le roy feust assouagiez de sa maladie, et li revint l’esperit. Cil qui estoient entour li, disoient que son esperit avoit esté raviz. Quant il fu revenuz et il pot parler, il requist tantost la croiz pour aler outre mer et la prist devotement. Le roy commença à assouagier tant que Nostre Sires le mist à parfaite santé. Mout devint aumosniers après ceste maladie et religieus et fu en grant devotion de secorre la terre d’outre mer.
