parti du roy, le deable, qui touz jorz het pais et amour, mist contens et descort entre le viconte de Chestiaudun[1] et les mariniers qui devoient l’ost conduire outre mer, et se meslerent la gent au viconte aus mariniers et s’entreferirent de coutiaus trenchanz et d’espées et en i ot de bleciez et de mors. Entre lesquiex, ii Genevois furent ocis, des plus haus mestres d’eus touz. Le cri et la noise en vint devant le roy qui en fut mout corrouciez et commanda que l’en alast à eus pour eus departir atout iv mile hommes bien armez. Cil se bouterent en euls et les departirent à grant paine, tant estoient eschaufez les uns contre les autres. Le viconte sot bien que sa gent avoient mespris ; si se douta du roy et prist conseil au conte de Montfort[2] pour passer en Acre atout sa chevalerie ; mais le conte ne li loa pas sanz le congié du roy. Et quant le roy le sot, il li manda que il ne feust si osez qu’il passast outre, car par celle achoison se porroit l’ost departir et dessevrer, et la voie qu’il avoit emprise en seroit enpeechiée. Mais il feroit tant qu’il les acorderoit et qu’il sauroit lesquiex auroient esté cause du contens ; et que l’en s’en meist du tout en tout sus le cardinal[3]. A ce s’acorderent les Genevois et promistrent sus paine de ii cens mars d’argent qu’il se sofferoient à jugier à la court au roi de France du contens et du descort meu entre eus et le viconte de Chestiaudun.
