ces couvenances furent fetes el temps que le roi estoit en Chipre. Et fist entendant au soudan qu’il avoit trouvé en son sort que le roy de France seroit desconfis et seroit tenus et mis en mainz de Sarrazins. Le soudan fu trop durement lié de ce que cil disoit, car trop durement doutoit le venue au roy de France. Si li pria mout qu’il s’avançast d’acomplir ce qu’il prometoit, et li donna or et argent à grant foison, et le baiser en la bouche en signe de grant amour.
Ce mestre s’en parti de la terre d’outre mer et s’en vint en France. Quant il fu en l’entrée, si se pourpensa où et en quel partie il geteroit son sort. Si s’en ala droit en Picardie, et prist une poudre qu’il portoit et la jeta contremont en l’air parmi les champs, en non de sacrefice qu’il fit au deable. Quant il ot ce fet, il s’en vint aus pastouriaus et aus enfanz qui gardoient les bestes et lor dist qu’il estoit homme de Dieu. « Par vous, mes douz enfanz, sera la terre d’outre mer delivré des anemis de la foi crestienne. » Si tost comme il oïrent sa vois, il lessierent leur bestes et s’en vindrent après lui, et le commencièrent à suivre partout là où il volt aler ; et touz ceus qu’il trouvoit se metoient à la voie après les autres, si que sa compaignie fu si grant que en mainz de viii jourz il furent plus de xxxm, et vindrent en la cité d’Amiens, et fu toute la ville plaine de pastouriaus. Cil de la ville leur abandonnerent vins et viandes et tout quanqu’il demanderent, quar il furent si enfantosmé, qu’il leur estoit aviz que nulle plus sainte gent ne porroient estre. Si demanderent qui estoit le mestre d’euls, et il leur monstrerent ; et vint devant eus atout une grant barbe, aussi comme se il fust homme de penitance, et avoit le visage pale et
