bon jugement des traiteurs, qui sa mort et son domage li avoient pourchacié. Si donnerent sentence que par droit il devoient avoir les testes copées ; mès de Corradin furent-il en doute, car aucuns maintenoient pour Corradin qu’il estoit venu contre le roy pour recouvrer son heritage qui li devoit apartenir par raison de son pere, et que par ce ne devoit pas recevoir mort. A ce, se feussent tuit acordé, se ne feussent cil de Naples qui ne porent soffrir la delivrance Corradin, pour ce que Corrat son pere avoit abatu les murs de la cité de Naples et toutes les fortereces, et le pueple domagié forment. Si fu condampné à recevoir mort avoec les autres. Quant il furent ainsi condampnez par jugement, l’en fist monter i homme en haut, si que touz le porent veoir et oïr, qui raconta comment l’église de Romme avoit esté grevée et tormentée de lonc temps passé, de par la parenté Corradin, dont il estoient les uns après les autres mors escommeniez et condampnez de l’eglise de Romme de hoir en hoir, de toute honneur et de toute digneté ; et au daesrain est la mescheance tornée seur Corradin. Après ce que il ot ainsi raconté au pueple porquoi Corradin estoit condampnez, l’en le mena et touz ceus qui estoient condampnez delez une chapelle où l’en leur fist oïr Requiem et tout le service des mors, et leur donna l’en congié d’avoir confession, et furent menez au lieu où il furent decolez[1]. Le pueple avoit grant pitié de Corradin pour ce qu’il estoit enfes le plus bel que l’en peust trouver. Cil qui leur copa les testes, les fist agenoillier, et furent par nombre vi, le conte Gauvain, le
- ↑ Cette exécution eut lieu le 29 octobre 1268.
