dist que il la trouveroit en i hospital où il ne repairoit que truans et chaitive gent. L’endemain par matin, s’en ala le chevalier cele part, si trouva sainte Ysabel qui estoit assise entre povres fame qui filoient laine, et avoit vestu i seurcot tout esrez et tout recluté. Quant le chevalier la vit, si en ot grant habominacion et dist à son escuier : « Par mon chief, ceste ne fu onques fille de roy ; aucun truant coquin l’engendra. » Si s’en retorna arrieres, ne onques ne la volt saluer ne parler à lui.
Quant la bonne dame ot ainsi esté lonc temps, une maladie la prist si fort que nature ne la pot souffrir. Si comme le prestre l’eneulioit, une volée d’oisiaus vint devers le ciel aussi blanz comme noif et se assistrent sus les arbres d’entour le porpris, et commencierent à chanter i chant si douz et si plaisant que la gent d’iluec entour laissierent toutes besongnes pour euls escouter, ne ne cesserent de chanter jusques a tant que l’ame li fu issue du cors[1]. Et quant elle fu transsie, il s’envolerent vers le ciel. Si tost comme elle fu mise en son tombel, toutes manieres de genz estranges et enfermes de toutes maladies diverses commencierent à guerir dès ce qu’il s’estoient reposé devant son tombel. Commune renommée s’espandi par le païs des granz miracles que Diex faisoit pour lui ; si que mout de bonnes genz de lointaignes terres la requistrent en grant devotion.
- ↑ Sainte Élisabeth mourut le 19 novembre 1231.
