Recueil des lettres missives de Henri IV/1579/30 avril ― À mon cousin monsieur le mareschal Danville

◄

précédente

Henri IV Lettres missives 1579

suivante

►

1579. — 30 avril. – I^re.

Orig. – B. R. Fonds Béthune, Ms. 8848, fol. 77 recto.

À MON COUSIN MONS^R LE MARESCHAL DANVILLE.

Mon Cousin, Desirant que l’exercice de la Religion soit continué en la ville de Montaignac^[1], suivant la priere et requeste que l’assemblée des Esglises m’a faict, laquelle je trouve trés-juste et racionnable, je vous ay bien voulu escrire la presente pour vous prier de bien affectueusement la leur vouloir accorder, sans vous arrester à ce qu’aulcuns pourroient alleguer l’absence du ministre, ce qui ne leur doibt prejudicier non plus que s’il eust esté malade, attendu qu’ils n’ont cessé de faire les prieres publiques, tenir leur consistoire et faire tous aultres actes concernant ledict exercice de la Religion, qui par ce moyen ne leur doibt estre osté. À quoy m’asseurant que vous y aurés esgard, je ne vous feray plus longue lettre, sinon pour prier Dieu,

Mon Cousin, vous donner, en santé, bonne et longue vie. De Mazeres, ce xxx^e jour d’apvril 1579.

Vostre affectionné cousin et asseuré amy,
HENRY.

1. Petite ville de l’ancien diocèse d’Agde en Languedoc, aujourd’hui chef-lieu de canton dans l’Hérault.