Là ù fu mors Rolans li boins contors,
Por Ganelon, le malvais traïtor,
Quant les traï al felon aumacor,
Al roi Marsile, dont puis ot desenor,
Dont fu jugiés à loi de traïtor.
Grant cort tint Kalles l’emperere au vis fier (*)
De haus barons, de contes, de princiers.
Sor toz i fu dus Naimes de Baivier
Et li Danois que l’en apele Ogier.
Tant avoit fait li cuivers losengiers
Par son avoir et besans et deniers
Qu’en la cort fu amés et tenus chiers :
O le roi siet au boire et au mangier,
Et s’est li uns de ses drus plus privés.
Se fait Macaire de Losane apeler.
Or entendés del cuivert losengier
Com vout le roi honir et vergoignier,
Par droite force et avoir sa moillier. (*)
A une feste del baron saint Riquier,
La gentis dame estoit en son vergier
O mainte dame son cors deporter ; (*)
Si se fesoit devant soi vieler, (*)
Une chançon et dire et chanter.(*)
