| ◄ Laisse CCCXCV | Laisse CCCXCVI | Laisse CCCXCVII ► |
Irez fu l’enperere e dist : « Par saint Silvestre,
« De ploisors grant outraje et ovres desoneste
« Me su je ja vangez : si fera ge de ceste.
« Cest feluns traïtor a feit une moveste
« Por voloir qe je moire : ce sa je manifeste.
« Mout m’a renduz bon cange qe sui en sa conqeste
« E par lui honorer su je an peril d’estre
« Perdanz, moi e mes homes, ou de membre ou de teste.
« Par cil Diex q’en la cros sofri paine et moleste,
« N’ala si Galaaz por le Graal en queste
« Con je ferai par lui en plains et an foreste ;
« E ne lui vaudra mie de suen brant la poueste,
« Qe bien pis me tenroie d’une scorchie beste
« Si pandre ne le faiz ; si an soit q’en puet estre. »
Sallamons en apelle, que joste lui s’areste :
« Ralions nostre gient, qe fuit come campestre ;
« Orandroit puis jurer sor la voire Mageste
« Qe mais non fuï tant cum tresist arbalestre.
« De ce prendrai venjance, se unqe mais port veste,
« E non lairai en vie un tot sol de sa jeste.
— Sire », dist Salemons, « mau dehait qi ce plestre ! »