◄ Laisse DCXV | Laisse DCXVI | Laisse DCXVII ► |
A terre les out mis, qant voit q’il ne puet més ;
Lor qevaus en trarent, q’asés sont travailés.
Il n’i a nul des qatres qi n’ait son cors armés.
Rolant, qant fu a tere, si li feri dou pés,
Dont l’estormant sorrit, larmoiant de pietés.
« Sire », dist il, « or dites, qel part vos an irés ?
« Ces drais e ces hernois, con les en porterés ?
— Por ma foi », dit li dus, « ancois les retenrés.
« Un tel servis orandroit feit m’avés
« Qui non poroit jamais estre geardonés. »
Rolant monte a qeval, qant le voit enselés ;
Son escu a son col, prant l’espié amolés ;
Ausi ferent les autres, de bon coraje heités.
Aquilant e Sanson ont lor ars entoisés
E ont plens de sajete li carchois d’autre lés ;
D’argiant en lor monieres aporterent asés.
« Estormant », dit Rolant, « a Diés vos en alés.
— Sire », ce dit Brecer, « trestuit qatre soiés
« A celu Sir rendus qi en crois fu penés,
« Qu’il vos lais bien aler la ou vos desirés. »
Atant a dit Rolant : « Segnor, o mei venés ;
« Je sai bien ou je sui venus et arivés.
« Nen aiés nus regart d’ome dou siegle nés ;
« Se nule jent trovons, a moi parler leisés. »
Adonqe sont le troi trestut reconfortés ;
Rolant s’est mis avant, e cil s’en vont aprés.