◄ Laisse DI | Laisse DII | Laisse DIII ► |
De mautalant vient Rollant pali e van ;
Dit au Paiens : « Tu pués estre vilan,
« Quand vilenie me dis sens nul certan ;
« Mais se fuses armé o engual man,
« Dir te savroie, licer, fils a puitan,
« C’anc ne robai tant qe valsist un pan.
« Por qe is d’avoir e de richeçe plan,
« Altrui desprises com orgoilos e van. »
Ce dit les autres : « Por mon Deu Tervigan,
« Se ne partés, estes de mort proçan. »
En pié sali, si l’a pris por le fran ;
Un’ ace avoit, si croit estre un Trajan :
Ferir voloit por le pis l’auferan,
Mais le niés Karle tient le esplei en sa man,
Fiert le glotons a loi de castelan.
Li colp n’i trove ni oubers ni clavan,
Li cors li trençe, mort l’abat au teran.
E pués retorne e fiert le primeran
Si por le pis qe mort l’abat de plan.
Por ce dit voir dan Caton li Roman :
Gran vertus est a metre a la lengue le fran.