◄ Laisse DII | Laisse DIII | Laisse DIV ► |
Roland descend, quand les Turc oit tüé ;
Mais quand il pense qe il ni estoient armé,
Anc plus dolant ne fu en son aé.
Il les regarde cun un vis esgaré
E pués a dit : « Roland, or es vengié.
« Ei ! cheitis home e plain de crualté,
« Com ais ici ton mautalant monstré !
« Sor dous sens armes ais ton cuer desanflé ;
« Mais si cum tu eis garnis fusent esté :
« Tu ne i avroies solemant regardé.
« Sainte Marie, roïne mer de Dé,
« En quel desgraçe sui de vos fils entré !
« Tuit les honor deu siegle ai oblïé.
« Oliver frere, en vos le recevré :
« Vos ni aveç paril au siegle de bonté. »
De ces paroles s’est li duc saolé :
D’autre mangier ça n’i vient volenté.
Atant qe il a cist gran duel demené,
Fu l’estormant de la nef arivé
Cum .vii. sarçant en un batel feré ;
Blance oit la barbe e bien fu conreé
Selong la guise dou reigne und il fu né.
Roland le voit, le vis lor a torné.
Ainc qe fussent li Paiens aprosmé,
Est le stormant devant lui genoilé ;
En son langaje dist : « Ci t’a envoié,
« Vertuos home, la divine bonté :
« De dous dyables m’ais encui delivré.
« Ois m’avoient cis glotons menacé
« D’oncir, por qoi ne i avoie amené
« En lor païs e ja avoient juré
« Qe sol por moi e por mes gran pecé
« Estoit le oraje e le mal temps levé.
« Garis m’avés, qe estoie perilé :
« Bien en devés estre geardoné.
« Se vos d’avoir eüsés volunté,
« Tot cil dormons en est plain e rasé.
« E se volrés venir en mon reigné,
« Moi e cestors vos ferons fiauté :
« En pluisor leu gran besoing nos avré. »
Respond Roland, qe bien fu latiné :
« Vostre merci. De qel tere estes né ?
« Grand mestier ai de la vostre amisté.