| ◄ Laisse DLXIII | Laisse DLXIV | Laisse DLXV ► |
N’est pas merveille se le amirant s’aïre,
Chant il voit mort la flor de sun enpire
Que plus pro ert que je non sai deschrire.
Les jentils homes rechunfortent lor sire ;
Se fust laisé, il se vouloit oncire.
Entre dos paille firent le cors covrire ;
Porter l’en funt decisque an lor navire.
Rois Malquidant vait le roi Soudain dire :
« Tu moi faisis, dans Soudain, cha venire
« Et si devoie tun parant devenire ;
« Bien te pohoies a grant honor tenire
« Chant je deignoie ta fille recoulire.
« Se bien feisoie, randuz m’en as le mire,
« Chant a un ribaut m’ais fait mon niés tolire.
« Une riens saches, non le te voil taisire,
« Que la venjance non se poit ja guencire :
« Tu non veras li treze mois chunplire
« Que tu verais Malquidant revenire
« Chun plus de gent, par tun regne esillire,
« Que Agollant non chundust en Cecire.
« Navrais fortece que je non face aflire,
« Ne aut barons, s’il veul de mort garire,
« Ne toi choveigne refuser de servire.
« Se non te vais tot vis a infuïre,
« A mes dos main, ce non te poit falire,
« Prendrai venjance sor toi de mon martire
« Tant croie et fiere que je ferai fremire
« De paor zel que soul l’oiront deschrire.
« Ne t’estuet mie ne jor ne nuit dormire :
« Je toi desfi, plus non te voit geïre. »
De grant doutance le roi Soldain sospire ;
Paor i fist le respondre taisire,
Char bien conuit cil estoit si grant sire
Que bien poroit la promise fornire.