◄ Laisse DLXXXVI | Laisse DLXXXVII | Laisse DLXXXVIII ► |
Le uns le motre a l’autre, cant lor ont incontré ;
Bien disoient entr’ aus : « Etre poit verité
« Que cist soit le meldre home de le Paieneté.
« Pué que le cors insenble e le cuer sunt fermé
« E qu’il sunt d’ardiment et de sens inflamé,
« Bien li est convenable une grant dignité. »
Molt l’unt li jentils ome entre lor festoié ;
Tronpes, nacres et tanbors i sone tel planté,
Ester les cris des homes que li sunt amasé,
Qu’il en tentist les air, le pois et le valé,
Ne l’uns poit oïr l’autre, tant par soit escrïé.
Chant asés ont Rolant et Sanson acolé,
Si sunt a molt grant joie dedans Monmir entré ;
De dames, de poncele, d’infans de josne aé
Furent tuit li baucons garni et incarçé.
En mi leu d’une place, o il sunt arivé,
Desandi eramant le Karlemaigne né ;
En ses bras prant Sanson, si le a desmonté,
Pué le mis tot avant au poier d’uns degré.
Chant il sunt au palés un petit répousé,
Si sun allez super, chant il furent lavé.