| ◄ Laisse DLXXXVII | Laisse DLXXXVIII | Laisse DLXXXIX ► |
Aprés qu’il ont mangié, si fait bandir Rolant
Le soir avant choucer qe, a l’aube aparant,
Trestuit li civaler de le citez manant
Fusent aparilés d’armes et d’auferant
A seguir les ensaigne au rice roi Soudant,
Que tuit les velt veoir an un prés verdoiant.
Trestuit les gentils ome en firent joie grant ;
Le soir et tote nuit travailent li sergant,
D’armes et d’entresaigne funt grant aprestement.
La nuit, an une chanbre a fin or flanboiant,
Dormirent en dos lit li fils Mille e l’infant ;
Chan le jor aparuit, si se arment atant,
Fun soner sor la tor plus de dis olifant,
Pué montent a civals tuit comunablemant ;
An un prés sunt insus a miler et a zant :
Iluec fu esleü li foibles dou valant.
Chant Rolant i trovoit un rice ome d’arzant
Que fust foibles de cors et trop viels et ferant,
Il non le voloit mie en son asenblemant,
Mais si li fait trover uns pobre om desirant
De cunquer honor d’armes, se d’avoir ert pusant :
Diner, cevaus et armes il i fait douner tant
Qu’il poit an l’ost venir bien honorablement,
Si que le rice el poubres disent : « Je m’en contant. »