| ◄ Laisse DXIV | Laisse DXV | Laisse DXVI ► |
Rolant chevauche vers li plan de Persie :
Jesus de glorie i soit chadel e guie !
S’en vient as tendes dont la plaigne est remplie,
Qe il senbla que fust une ost bandie.
Nel voit Paien que l’uns l’autre non die :
« Cist home armei », font il, « que senefie ?
« Cevaler sanble erant d’ancesorie.
« Qi puet il estre ? Dont vien ? De quel partie ?
— Par Mahomet », respondi une spie,
« François me sanble ou de vers Lombardie. »
Le dus çevalce, qe n’i respondi mie ;
O lui s’arotent de Paiens grant partie.
Le baron garde en une praerie
E voit le tref de greignor segnorie :
La avoit la flor de la grant baronie ;
La veit desendre dou liart de Pavie.
Maint jantis homes encontre lui s’envie ;
Uns damoisel, fil le roi d’Orquenie,
Li estrés li tient, tant oit de cortesie.
Un eschüer à la resne saisie,
E cil l’enquiert dont estoit s’ancontrie :
Il dist : « De Ispagne, d’une tere asalie
« Por Carlemaine, qe ensi la mestrie
« Qe roi Marsile a grant mester d’aïe.
« Cheil est le rois qe vos out en balie ?
« Lui sui venus et a sa gentilie. »
E cil li amaine a la tende joilie.