◄ Laisse XCVI | Laisse XCVII | Laisse XCVIII ► |
Ech vos Reliant a tere desendu,
L’espee traite, s’anbraça son escu.
A grant mervoile l’a gardé Feragu,
Par ce s’areste q’il ne l’avoit feru,
Car molt mervoile de ce q’il a veü ;
Lors se quida do tot avoir vencu.
« Dam glot », fit il, « vos estes recreü ;
« Mien esiant, j’en sui aperceü ;
« En queil escoile avois lit n’entendu.
« Che chevaliers perdist par l’abatu ?
« Anchué verois Oliver vostre dru.
— Voir », dist le duc, « a tote sa salu. »
Alors brandist le bon brand amolu ;
En la venue do Paiens est coru,
Mais lo penser de ferir est perdu,
Che le Paiens l’a primain conseü,
Sor le baron a son fust enbatu
De molt grant force e de roiste vertu.
S’adonc l’eüst par mié l’hiaume feru,
Jamais n’avroit ne mangé ne beü.
Mais le vasal, quant voit q’il ne puet plu,
En mie sa targe a le colp receü.
La borcle a freite e le cantel ronpu ;
Les trois balotes, dunt avois entendu,
Paserent outre dejoste l’hiaume agu,
D’une tot seule le ber toché n’en fu,
Neporquant est an jenoilon cheü ;
Mais ne fu mie de drecer esperdu.
Al relever li a son colp rendu,
Par desor l’anche fausa l’obers menu,
Le ganbaus trenche, qe fu d’un chier velu,
Trosqu’en la carn li a mis le brand nu.
Quant fers est mielz e tremprez e batu,
Quant le bon brand ne l’empire un festu,
Soz ciel n’a arme que l’eüst ofendu.
De ce n’est anch dam Rollant aveü,
Anç done un saut devers un poi erbu.
Carles le garde, paoros e irescu.
« Diex ! », dist le roi, « mon neveu ai perdu. »
Lors li faut l’ame ; ja chaïst estendu,
Quant Naymes l’a en si bras retenu.