Ballades sur plusieurs sujets/Ballade IX
Mon gracieulx cousin, Duc de Bourbon,
Je vous requier, quant vous aurez loisir.
Que me faittes, par balade ou chançon.
De vostre estat aucunement sentir ;
Car quant à moy, sachiez que, sans mentir,
Je sens mon cueur renouveller de joye,
En esperant le bon temps avenir
Par bonne paix que brief Dieu nous envoyé.
Tout crestian qui est loyal et bon,
Du bien de paix se doit fort resjoir,
Veu les grans maulx et la destruccion
Que guerre fait par tous pays courir
Dieu a voulu Crestianté punir
Qui a laissié de bien vivre la voye,
Mais puis après, il la veult secourir
Par bonne paix que brief Dieu nous envoye.
Et pourcela, mon treschier compaignon,
Vueilliez de vous desplaisance bannir,
En oubliant vostre longue prison
Qui vous a fait mainte doleur souffrir ;
Merciez Dieu, pensez de le servir,
Il vous garde de tous biens grant montjoye
Et vous fera avoir vostre desir
Par bonne paix que brief Dieu nous envoye.
Resveilliez vous en joyeulx souvenir.
Car j’ay espoir qu’encore je vous voye
Et moy aussy en confort et plaisir
Par bonne paix que brief Dieu nous envoye.