Ballades sur plusieurs sujets/Ballade XII
Puisque je suis vostre voisin
En ce pais présentement,
Mon compaignon, frere et cousin,
Je vous requier treschierement
Que de vostre gouvernement
Et estat me faictes savoir,
Car j’en orroye bien souvent,
S’il en estoit à mon vouloir.
Il n’est jour, ne soir, ne matin,
Que ne prie Dieu humblement
Que la paix prengne telle fin
Que je puisse joyeusement,
À mon desir, prouchainement
Parler à vous et vous véoir ;
Ce seroit treshastivement.
S’il en estoit à mon vouloir.
Chascun doit estre bien enclin
Vers la paix, car certainement
Elle departira butin
De grans biens à tous largement.
Guerre ne sert que de tourment,
Je la hé, pour dire le voir,
Bannie seroit plainement,
S’il en estoit à mon vouloir.
Va, ma balade, prestement
À Saint Omer, monstrant comment
Tu vas pour moy ramentevoir
Au Duc à qui suis loyaument.
Et tout à son commandement,
S’il en estoit à mon vouloir.