Ballades sur plusieurs sujets/Ballade XVI
Des nouvelles d’Albion
S’il vous en plaist escouter,
Mon frère et mon compaignon,
Sachez qu’à mon retourner,
J’ay esté, deça la mer,
Receu à joyeuse chiere.
Et a fait le Roy passer,
En bons termes, ma matiere.
Je doy estre une saison
Eslargi pour pourchasser
La paix aussi ma raençon ;
Se je puis seurté trouver
Pour aler et retourner,
Il fault qu’en haste la quiere,
Se je vueil brief achever,
En bons termes, ma matiere.
Or, gentil Duc Bourgongnon,
De ce cop vueilliez m’aydier,
Comme mon intencion
Est vous servir et amer,
Tant que vif pourray durer.
En vous ay fiance entiere,
Que m’ayderez à finer,
En bons termes, ma matiere.
Mes amis fault esprouver
S’ilz vouldront à ma priere
Me secourir pour mener,
En bons termes, ma matiere.