Cléopâtre (Benserade)/Epître à Monseigneur l’Eminentissime Cardinal Duc De Richelieu

La bibliothèque libre.
Antoine de Sommaville.

à
Monseigneur
l’Eminentissime
Cardinal Duc
De Richelieu.


Monseigneur
,

Quand on verroit Cleopatre dans le plus ſuperbe appareil du monde, qu’elle vous viendroit trouver dans un vaiſſeau d’argent à rames d’or, & à voiles de pourpre, comme lors qu’elle vint en Cilicie braver un Empereur, & corrompre l’intégrité d’un Juge dont elle fit un amant : quand dis-je, elle brilleroit de l’éclat de mille perles plus riches, & plus precieuſes que celle qui compoſa toute ſeule un feſtin dont la magnificence effaça le luxe, & la ſomptuoſité de tous ceux qu’avoit faits Marc-Antoine, elle auroit encore quelque choſe à deſirer pour ſe rendre digne de vous eſtre preſentée, & une ſimple nudité ne luy ſeroit pas moins avantageuſe que tous ces beaux ornemens. La nature des choſes que l’on vous conſacre doit eſtre tout à fait excellente, ou ſi elle a quelques deffauts, il eſt beſoin qu’ils ſoient comme cachez, & enſeuelis dans l’excellence de l’art, c’eſt à dire que les victimes qu’on vous immole doivent eſtre parfaitment pures, ou extremement parées. De moy je vous avouë icy ingenümẽt que je ne me cognoy pas moy-meſme, & que je ne ſçay ſi ceſt zele, ou temerité qui me fait entreprendre de vous offrir ſi peu de choſe avec tant d’aſſurance, apres que les plus doctes Genies ont tremblé en pareille occaſion, & ont crû vous dédiant leurs ouvrages qui auroit eſté adorez de tout le monde, que c’eſtoit peu de ſacrifier meſme des idoles à une divinité. Mais je paſſe par deſſus toutes ſorte de conſiderations, pour vous ſuplier treshumblement de proteger mon Egyptienne, elle eſt ſi foible, qu’elle ne peut pas ſubſiſter d’elle-meſme, & ce ſeroit aſſez pour la faire tomber que de ne la pas ſoutenir. Comme la médiſance, & l’enuie ſont deux monſtres qui n’epargnent pas ce qu’ils ne cognoiſſent pas, je ne fay point de doute qu’ils n’attaquent Cleopatre, & qu’il ne s’élance contre elle pluſieurs Aſpics donc les piqueures luy pourront eſtre beaucoup plus dangereuſes que celles du premier qui luy conſerva l’honneur aux dépens de la vie, mais vous l’en garentirez, Monſeigneur, vous la ferez vivre, & voſtre ſeul nom fera pour la gloire de cette pauvre Reine ce que le jeune Ceſar ne pût faire pour ſon propre triomphe.

Je ſuis,

Monseigneur,
de vostre eminence,


Lettre-humble, très obeiſſant,
& tres-fidelle ſerviteur,
de Bensseradde.