D’un profond pensement j’avois si fort troublée
Apparence
(Redirigé depuis D’un profond pensement j’avois si fort troublee)
D’un profond pensement j’avois si fort troublée
XXVII
D’un profond pensement j’avois si fort troublée
L’imagination, qui toute en vous estoit,
Que mon ame à tous coups de mes lévres sortoit,
Pour estre, en me laissant, à la vostre assemblée.
J’ay cent fois la fuitive à l’hostel r’appellée,
Qu’Amour me desbauchoit : ores elle escoutoit,
Et ores sans m’ouyr le frein elle emportoit,
Comme un jeune Poulain qui court à la vollée.
La tançant, je disois, Tu te vas decevant.
Si elle nous aimoit, nous aurions plus souvent
Course, poste, message, et lettre accoustumée.
Elle a de noz chansons, et non de nous soucy.
Mon ame, sois plus fine : il nous faut tout ainsi
Qu’elle nous paist de vent, la paistre de fumée.