Estat de l’Empire de Russie/Épistre au Roy
AV ROY.
I les Subiects de Vostre Maiesté qui voyagent
en Païs esloignez, faisoient leurs relations
au vray de ce qu’ils y ont veu et marqué
de plus notable, leur profit particulier
tourneroit à l’vtilité publique de vostre Estat :
non seulement pour faire veoir, rechercher et
imiter ce qui est de bon et industrieux chez
autruy, estant tres-vray que Dieu a disposé
toutes choses en sorte que pour mieux entretenir
la societé entre les hommes, les uns
trouuent ailleurs ce qu’ils n’ont pas chez eux :
mais aussi cela donneroit cœur à nombre des
ieunes gens oysifs et casaniers d’aller chercher
et apprendre la vertu dans le penible,
mais vtile et honorable exercice des voyages
et des armes estrangeres, et leueroit l’erreur à plusieurs qui croyent que la Chrestienté
n’a bornes que la Hongrie : car ie puis dire
auec verité que la Russie, de laquelle i’entreprens
icy la description par le commandement
de vostre Maiesté, est l’un des meilleurs
bouleuards de la Chrestienté ; et que cet
Empire et ce païs-là est plus grand, puissant,
populeux et abondant que l’on ne cuide,
et mieux muny et deffendu contre les Scithes
et autres peuples Mahometans, que plusieurs
ne iugent. La puissance absoluë du
Prince en son Estat le rend craint et redouté
de ses Subiects, et le bon ordre et police du
dedans, le garantit des courses ordinaires
des Barbares. Apres donc, SIRE, que vos trophées
et vostre bon-heur eurent acquis à vostre
Maiesté, le repos duquel la France iouist à
present ; et voyant de là en auant mon seruice
innutile à vostre Maiesté, et à ma patrie,
que ie luy auois rendu pendant les
troubles sous la charge du Sieur de Vaugrenan
à sainct Iean de Laune, et autres frontieres
de vostre Duché de Bourgongne : i’allay
seruir le Prince de Transsyluanie, et en
Hongrie l’Empereur, puis le Roy de Pologne
en la charge de Capitaine d’vne compagnie
de gens de pied et finalement la fortune
m’ayant porté au seruice de Boris Empereur
de Russie, il m’honora du commandement
d’une compagnie de Cauallerie, et apres son decez Demetrius receu audit Empire me continua
en son seruice, me donnant la premiere
compagnie de ses gardes, et pendant ce
temps i’eus moyen d’apprendre, outre la langue,
vne infinité de choses concernans son Estat,
les loix, mœurs et religion du Païs, ce
que i’ay representé par ce petit discours auec
si peu d’affection, voire auec tant de naïfueté,
que non seulement vostre Maiesté, qui
a l’esprit admirablement iudicieux et penetrant,
mais aussi chacun y recognoistra la
verité, laquelle les anciens ont dit estre
l’ame, et la vie de l’histoire. Si ce discours
plaist à vostre Maiesté tant soit peu, c’est
mon unique contentement ; puis qu’apres auoir
daigné m’escouter, elle a agreable en outre
de me lire, m’asseurant qu’il s’y verra des
accidens bien remarquables, et dont les
grands Princes peuuent tirer quelque profit,
mesmes par l’infortune de mon maistre Demetrius ;
arriué auec grandes trauerses à son
Empire, esleué et bouleversé tout en moins
de deux ans, et sa mort mesme suiuye de ce
mal-heur qu’aucuns le iugent auoir esté ou
imposteur ou supposé : il s’y verra pareillement
beaucoup de particularitez de cet Estat
dignes d’estre sçeuës, et toutesfois ignorées
tant pour l’esloignement du climat, que pour
la dexterité des Russes à cacher et taire les
affaires de leur Estat. Ie supplie Dieu, SIRE, maintenir vostre Maiesté en prosperité,
vostre Royaume en paix, Monseigneur
le Dauphin au desir d’imiter vos vertus, et
moy au zele que i’ay tousiours eu de pouuoir
par mes tres-humbles services meriter
le nom,
tres-fidelle et tres-dedié
seruiteur de V. M.