Iconologie (Cesare Ripa, 1643)/I/Exercice
Exercice. LIV.
Es diuers effets que l’Exercice produit, nous
ſont demonſtrez par vn ieune Homme veſtu de
pluſieurs couleurs, auec les bras nuds, vne Horloge
à la teſte, vn Cercle d’or en vne main, &
en l’autre vn Rouleau, où eſt eſcrit le mot Enciclopædia.
Il porte de plus vn Chapelet à la ceinture, &
vn petit bout d’aiſle à chaque coſté de ſes pieds, à l’entour deſquels
ſe voyent quelques pieces d’armes, & des outils d’Agriculture
luiſans & polis.
L’Exercice eſt le trauail ordinaire où l’Homme s’employe, pour ſe rendre habile en la profeſſion : à quoy difficilement il peut arriuer, s’il ne met la main à l’œuure ; puis qu’au rapport d’Ariſtote, L’on n’excelle iamais en quelque Art que ce ſoit, ſi le naturel, le ſçauoir & l’Exercice n’agiſſent enſemble.
Il eſt peint ieune, à cauſe qu’il n’y a point d’aage qui ſçache reſiſter à la fatigue mieux que celuy-là ; Veſtu de pluſieurs couleurs, pour monſtrer qu’il y a diuers moyens de s’y adonner ; Et les bras decouuerts, afin d’en eſtre plus ſouple, & plus diſpos.
L’Horloge qu’il a ſur la teſte ſignifie, Que par luy nous paruenons à la connoiſſance du vray, comme par la continuelle action des roües d’vn Horloge, nous diſtinguons le temps & les heures. Le Cercle d’or qu’il tient en main eſt vne marque de perfection ; D’autant que cette Figure eſt la plus accomplie de toutes celles de Mathematique, & l’or, le plus pur de tous les Metaux. Le Rouleau qu’il porte en la main droite, auec le mot d’Enciclopedie, monſtre l’eſtroitte liaiſon qu’il fait des Arts & des Sciences, ſoit pour la Guerre, ſoit pour la Paix ; Tout de meſme, que le Chapelet qui pend à ſa ceinture, nous figure l’Exercice ſpirituel entre pluſieurs, qu’il y en a qui ſont autant d’inſtrumens au ſalut, comme inſeparables d’auecque la Religion.
Que ſi l’on ne luy donne que la moitié d’vne aiſle à chaque pied, c’eſt pour faire voir, Qu’il faut neceſſairement qu’il ſoit dans vne iuſte moderation, ſans laquelle il ne peut eſtre que nuiſible. Car comme l’oiſiueté rend l’homme laſche, & indiſpoſé, ainſi l’Exercice moderé donne de la vigueur à l’eſprit, & de l’embompoint au corps, dont il fortifie la chaleur.
Quant aux diuers outils pour le labourage, qui ſont à l’entour de luy, exempts de roüille & luiſans, cela veut dire, qu’ils ſe poliſſent par la peine que l’on prend à cultiuer la terre & les plantes ; D’où il faut conclure que l’Exercice eſt neceſſaire à l’entretenement de la vie. Auſſi eſt-il dit dans l’Eſcriture, Que celuy qui labourera ſa terre, ſera raſſaſié de pain.