Iconologie (Cesare Ripa, 1643)/I/Eternité
Eternité. LIII.
Cette Image de l’Eternité eſt de l’inuention de Monſeigneur Barberiny Florentin, qui dans le Traicté qu’il a fait de l’Amour, la repreſente ſous la figure d’vne belle Dame, de qui les cheueux eſpars & de couleur d’or, luy tombent ſur les epaules, & deſcendent aſſez long.
Auecque cela, des deux coſtez où deuroient eſtre les hanches, prennent racine deux demy Cercles ; qui ſe pliant, l’vn à droit, l’autre à gauche, s’entrerencontrent ſur la teſte de cette Dame auec vne eſgale iuſteſſe, en forme de Cercle. Elle a de plus deux Boules d’or en ſes mains, qu’elle tient hauſſées, & le corps couuert d’vn bel Azur, fermé d’Eſtoilles. Tout cela, ce me ſemble, eſt vn vray ſymbole de l’Eternité ; ſoit que l’on conſidere, ou la figure ronde, qui n’a ny commencement, ny fin, ou la perfection de l’or, qui eſt le plus durable de tous les metaux, ou la couleur azurée repreſentant le Ciel, qui eſt la choſe du monde la moins corruptible.
Ce n’eſt pas encore ſans raiſon, que dans Pierius elle eſt peinte aſſiſe ſur vne Sphere celeſte, tenant de la main gauche vn Soleil ; & de la droite vne Lune : Par où il eſt declaré, Que ces deux Aſtres agiſſent ſans ceſſe à la generation des choſes d’icy bas, auſquelles ils donnent nourriture. Et c’eſt pour cela meſme qu’elle eſt aſſiſe ſur vn Ciel, comme vne choſe durable & perpetuelle. I’obmets, qu’il ſe void vne Medaille de l’Empereur Adrian, où elle ſouſtient deux teſtes couronnées, auecque ces mots Æternitas Avgvsti & SC. Et qu’il y en a vne fort ancienne, où elle eſt aſſiſe en vn Thrône, tenant vne Lance d’vne main, & de l’autre la figure d’vn Genie, auecque cette inſcription, Clod. Sept. Alb. Avg.