Iconologie (Cesare Ripa, 1643)/I/Diligence
Diligence. XL.
Ne merueilleuſe viuacité ſe remarque dans le
viſage de cette Femme, qui en ſa main droite a
vn rameau de Thim, où vole vne Abeille ; en la
gauche vn Boucquet de fueilles d’Amandier &
de Meurier ; & à ſes pieds vn Coq, qui gratte
la terre.
Soit que la definition de la Diligence doiue eſtre tirée de ſes ethymologies, ou des differens effets qu’elle produit, tant y a qu’elle ſe prend, à mon aduis, pour cette exacte induſtrie que nous mettons à faire le choix de ce qui nous eſt le plus conuenable, dans la conduite de nos actions.
de Orat. 2 Cette Vertu, dit Ciceron, eſt d’autant plus recommendable, qu’elle ſurpaſſe les autres, comme les comprenant toutes : C’eſt pourquoy nous deuons bien eſtre ſoigneux de luy faire la cour, n’y ayant rien de ſi difficile, que par ſon moyen nous ne puiſſions obtenir.
Elle nous eſt figurée par l’Abeille qui vole deſſus le Thim, herbe, dit Plutarque, qui n’eſt pas moins rude qu’elle eſt ſeiche, & où neantmoins les mouches à miel ne laiſſent pas de trouuer vn ſuc agreable, qui leur ſert plus qu’aucune autre plante, à faire vne precieuſe liqueur. Les hommes ſoigneux & diligens les imitent, en ce que par leur induſtrie ils ſurmontent ce qu’il y a de plus rude & de plus difficile dans les affaires. Tellement que des eſpines ils en font des fleurs, comme du Thim l’Abeille en tire du miel.
Or pource que la Diligence, ſelon ſainct Thomas, eſt quelquefois priſe pour le ſoin meſme, & qu’il eſt nuiſible d’en trop auoir ; il faut y apporter la moderation requiſe, & ſe ſouuenir de l’exemple de Protogenes. C’eſtoit vn des plus celebres Peintres de Rhodes, à qui, ſelon Pline, le fameux Apelle n’auoit autre choſe à reprocher ſinon qu’il trauvailloit trop ; Il m’égalleroit auſſi, concluoit-il, n’eſtoit que ie le ſurpaſſe en vne choſe, qui eſt, que ie ſçay mieux que luy, oſter la main de deſſus la toille.
Cette Diligence doncques, qui ne peche point par excez, mais qui ſe haſte d’aller bellement, & que pluſieurs excellens hommes ont diuerſement repreſentée, comme Auguſte par l’Eſcreuice & le Papillon ; Veſpaſien, par vn Dauphin à l’entour d’vn Ancre ; Paul troisieſme, par le Cameleon attaché à vn Dauphin, & le grand Duc Coſme par vne Tortuë ſous la voile d’vn nauire ; N’eſt pas icy figurée mal à propos par des fueilles d’Amandier & de Meurier iointes enſemble. Car l’Amandier eſtant celuy de tous les Arbres qui fleurit le pluſtoſt, & le Meurier au contraire, celuy qui fleurit le plus tard. Ils ſont liez l’vn à l’autre, pour monſtrer, Qu’il faut moderer les ſoins que l’on ſe donne, & tenir pour ſage & bien aduiſé celuy qui entre la promptitude & la tardiuité ſçait tenir vn vray milieu, qui à proprement parler, eſt ce qu’on appelle Diligence.
Le Coq qui ſe void à ſes pieds en eſt encore vn ſymbole, ſoit à cauſe que cét Oyſeau, qui eſt grandement ſolaire nous annonce le iour, & nous eſueille au trauail ; ſoit pource que de ſoy-meſme il s’y porte ponctuellement, & qu’il eſpluche iuſques aux moindres grains, & les diſcerne d’auec les ordures, ne ceſſant de gratter la terre, qu’il n’ai trouué ce qu’il cherche pour ſa nourriture.