Iconologie (Cesare Ripa, 1643)/I/Raiſon
Raison. CXXXIX.
Ette ieune Fille, armée à peu prés comme la Deeſſe
Pallas, repreſente la Raiſon ; Elle a ſur ſon Heaume
vne riche Couronne d’or : En la main droite vne Eſpée
nuë, en la gauche vn Lyon, à qui elle a mis vn
frain, & deuant ſon eſtomac vne maniere de Plaſtron, ſemé
de notes d’Arithmetique.
Cette Vertu, que les Theologiens appellent la plus puiſſante force de l’ame, pource qu’elle commande à l’homme, & luy donne de vrayes Loix, eſt peinte ieune & armée, à cauſe qu’elle ſubſiſte par vne extraordinaire vigueur de Sageſſe : Ce que les Anciens nous ont figuré par les armes exterieures, principalement par celles de Minerue.
La Couronne d’or nous enſeigne, Que la Raiſon ſeule eſt capable de mettre les bons courages ſur le theatre, & dans l’eſtime vniuerſelle des hommes : Car l’or n’a pas de plus grands auantages ſur les Metaux, qu’en a la Raiſon ſur les puiſſances de l’ame, qu’elle regle par ſa conduitte : Auſſi a-t-elle ſon ſiege en la plus noble partie du corps.
Par ſes bras nuds ſe doiuent entendre les actions, qui ſont touſiours bonnes & ſans tache, quand elles ſe laiſſent guider à la Raiſon :
L’Eſpée qu’elle porte nous fait ſouuenir, Qu’il faut s’en ſeruir courageuſement à exterminer les monſtres de l’ame, c’eſt à dire les vices qui luy font la guerre. Nous auons pour vn parfait exemple de cecy Iesvs-Christ noſtre ſouuerain Maiſtre, la Doctrine duquel n’a point d’autre but que d’arracher les vieux pechez de nos ames, & d’en couper la racine par le moyen de la Raiſon, eſclairée de ſa grace.
Le Frain dont elle arreſte le Lion, ſignifie l’empire qu’elle a ſur les paſſions, qui ſont naturellement farouches, & indomptables. Et comme par le moyen du chiffre on preuue les choſes reelles ; Ainſi par la force de la Raiſon l’on s’acquiert la connoiſſance de celles qui regardent noſtre commun bien.