Iconologie (Cesare Ripa, 1643)/I/Bienveillance

La bibliothèque libre.


Bien-veillance. XXI.


CEtte Figure ne ſe peut mieux expliquer que de l’vnion mutuelle qu’il y doit auoir entre deux perſonnes mariées. Elle repreſente vne Femme agreable, couronnée de fueilles de vigne & d’ormeau, enlacées peſle-meſle. Le bras gauche qu’elle tend, ſemble demonſtrer quelque action officieuſe ; comme le droit ſignifie ſa merueilleuſe tendreſſe enuers vn Alcion, qu’elle tient eſtroittement ſerré contre ſa belle gorge.

Sa Guirlande eſt vn ſymbole d’Amour, pour la grande ſimpatie qu’il y a naturellement entre la vigne & l’ormeau,

Dont la forte vnion par l’Amour enchainée,
Semble les auoir ioints ſous le joug d’Hymenée.

Quant à l’Alcion qu’elle eſtreint contre ſon ſein, c’eſt vne alluſion à la fable d’Alcione femme de Ceïx, Roy de Thrace, qui eut tant d’amour pour ſon mary, qu’ayant ſceu la verité du ſonge qu’elle auoit fait de ſa mort, aduenuë ſur la mer, elle s’y precipita de regret qu’elle en euſt. Ce qui donna ſujet aux anciens Poëtes de feindre qu’elle auoit eſté transformée en cét oyſeau qui porte ſon nom ; Et ce qui a fait dire depuis à noſtre Horace François. M. de Malherbe.

Ainſi fût ſourde au reconfort,
Quand elle euſt trouue ſur le bord
La perte qu’elle auoit ſongée,
Celle de qui les paẞions,
Firent voir à la mer Egée
Le premier nid des Alcions.

Ce n’eſt donc pas ſans raiſon que l’ingenieux Ouide s’eſt aduiſé d’vne ſi belle Metamorphoſe, afin d’obliger plus fort les femmes à l’amour de leurs marys. Car à vray dire, la femelle de l’Alcion aime tellemnent le ſien, qu’au rapport de Plutarque, Plut. de ſolert. anim. s’il arriue que la foibleſſe de l’aage le rende peſant au vol, elle le porte ſur ſes eſpaules : elle le nourrit & le ſoulage ; elle prend la meilleure part de ſes maux, & luy tient compagnie iuſques à la mort.