Iconologie (Cesare Ripa, 1643)/I/Fecondité
Fecondité. LIX.
E treuue que cette peinture ne luy conuient pas
mal ; Qui eſt celle d’vne ieune Femme, couronnée
de fueilles dde Cheneuiere. Elle tient prés de ſon
ſein vn nid de Chardonnerets ; & à ſes pieds ſe
voyent d’vn coſté, des petits Lapins qui ſe ioüent ; comme
auſſi des Pouſſins, qu’vne Poule regarde fixement, & qui viennet
d’eſtre eſclos.
Le plus grand bien que puiſſe auoir vne Femme mariée, eſt celuy de la Fecondité, par qui elle produit les fruicts deſirables qu’on ſe propoſe pour fin du mariage, à la plus grande gloire de Dieu. Auſſi eſt-il vray, que la procreation des enfans eſt entierement neceſſaire aux hommes par vn instinct de Nature ; Comme il ſe void par l’exemple meſme des creatures irraiſonnables : Car il n’y en a point, qui ne cherchent naturellement d’engendrer ſelon leur eſpece, ſans que toutefois elles en eſperent aucune vtilité. Or eſt-il que ç’en eſt vne bien grande, que d’auoir des enfans qui ſoient gens de bien ; comme Lib. 7. c. 44. Ariſtote le prouue en ſa Rhetorique : Ce que Pline encore dit eſtre vn des plus hauts points de l’humaine felicité, par l’exemple qu’il rapporte là deſſus de Cecilius Metellus le Macedonien, qui eut quatre fils eſleuez aux plus hautes charges de Rome, comme ayant eſté Preteurs, Conſuls, & Cenſeurs ; A quoy il adiouſte, Qu’au temps d’Auguſte, Caius Criſpinus fit vn ſacrifice ſolemnel au Capitole, auec neuf de ſes enfans, à ſçauoir, ſept Garçons, & deux Filles, vingt-ſept Nepueux, neuf Niepces, & vingt-neuf arriere-Nepueux. Ie ne parle point ny de Cornelie, de la maiſon des Scipions, d’où naſquit Voluſius Saturninus, qui fut Conſul auec l’Empereur Domitian ; ny de la Mere des Gracques, à qui ſelon Pline, vne grande Dame ayant vn iour fait monſtre de ſes joyaux, elle luy fit voir douze beaux Garçons, qu’elle auoit, luy diſant de bonne grace, que c’eſtoient là ſes plus precieux threſors ; Tellement qu’on peut bien aſſeurer, que cette felicité des Familles eſt ſi grande, qu’elle paſſe des particuliers à tout le public. Auſſi ordonna-t’on anciennement dans Rome, Que celuy qui ſe trouueroit auoir plus d’enfans, auroit par conſequent plus d’honneur, & ſeroit preferé aux autres en la dignité Conſulaire.
Elle eſt couronnée de fueilles de Cheneuiere, pource que cette herbe, dont la ſemence eſt fort menuë, & qui multiplie d’elle meſme, ſans qu’on apporte preſque point de ſoin à la cultiuer, deuient ſi grande & ſi forte, qu’elle ſouſtient les oyseaux qui s’y perchent.
Que ſi l’on demande à quel propos on luy fait tenir en main vn nid de Chardonnerets, l’on en trouuera la reſponse dans Lib. 10. c. 63. Pline. Car en ce meſme endroit de ſon Liure, où il dit, Que tant plus vn animal eſt grand, tant moins il eſt fecond, comme il ſe void par l’exemple des Chameaux, & des Elephans ; il remarque tout au contraire, Que des œufs du Chardonneret, qui n’eſt qu’vn petit oyſeau, il s’en eſcloſt iuſques à douze.
Pour cette meſme raiſon, elle a vne Poule à ſes pieds, à cauſe que cét oyſeau domeſtique eſt ſi fecond, que d’vn ſeul de ſes œufs il en ſort quelquefois deux pouſſins ; Ce que Pierius dit auoir veu dans Padoüe ; Et Albert le grand aſſeure le meſme. Que s’il en faut croire Ariſtote, il s’eſt touué des Lib. 7. c. 4. Hiſt. an. brebis aſſez ſouuent, qui ont porté iuſques à cinq agneaux à la fois : Et poſſible eſtoit-ce pour cela, qu’anciennement les Femmes en ſacrifoient deux auecque leur mere, s’il arriuoit qu’en leur accouchement elles euſſent des jumeaux. Mais il aduient quelquefois, qu’elles en ont bien dauantage, puis Lib. 10. c. 2. in Chro. qu’Aule-Gelle, Iulles Capitolin, Boterus, & Martin Cromer, nous aſſeurent, Qu’au territoire de Laurente, vne des eſclaues d’Auguſte, accoucha de cinq enfans maſles, qui veſcurent quelque temps : Qu’il en arriua de meſme à vne autre ſous l’Empire d’Antonin : Que l’an 1276. naſquirent de la Comteſ^se Marguerite trois cens ſoixante & quatre creatures, qui furent toutes baptisées, ſous les noms de Ieanne, & d’Elizabeth : Comme il ſe remarque encore auiourd’huy ſur leur tombeau, qui eſt dans vn Monaſtere de Religieuſes de ſainct Bernard, prés de la Haye en Hollande, où cette Hiſtoire eſt eſcrite au long : Et qu’en Cracouie l’an 1269. vne autre Marguerite, femme du Comte Verbolaüs accoucha de trente-ſix enfans.
Pour ce qui eſt des Lapins, qui ſe voyent à l’autre coſté de cette Figure, c’eſt fort à propos qu’ils y ſont mis ; ces animaux eſtans ſi feconds, qu’en allaictant leurs petits, ils en produiſent d’autres. A quoy ſe rapporte la remarque qu’en fait Valere le Grand, qui dit que dans vne certaine Iſle qu’il nomme, ils multiplierent en ſi grand nombre, que les habitans furent contrains de leur quitter la place, ſi fort ils en eſtoient incommodez.
A ce que ie viens de dire de la Fecondité, ſont conformes à peu prés deux anciennes Medailles, de Fauſtine & de Mamée ; En la premiere deſquelles, elle ſe void repreſentée ſur vn lict, auec des enfans qui ſe joüent à l’entour d’elle : Et en la ſeconde, par vne Femme, qui tient d’vne main vn Enfant, & de l’autre vne Corne d’abondance.