Iconologie (Cesare Ripa, 1643)/I/Grace de Dieu

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 79-84).

Grace de Dieu. LXXI.

C’Est vne ieune Vierge, qui par les merueilleux charmes de ſa beauté, rauit d’amour & d’admiration tous ceux qui la contemplent. Vne couronne reſplendiſſante ſe forme tout à l’entour de ſa teſte, dont les cheueux blonds s’eſpandent nonchalamment ſur ſes eſpaules ; & de ſes deux mains elle tient vne Corne d’abondance, d’où tombent pluſieurs ſortes de biens, qui ſont denotez par diuerſes enſeignes, & marques d’honneur. Mais elle ſe fait paroiſtre ſur tout par ſa nudité, & par les rayons qui l’enuironnent, depuis la teſte iuſques aux pieds.

Les beautez qui eſclattent ſur ſon viſage, ſont des ſymboles de celles de ſon ame, qui eſt pure & nette de toutes ſortes de taches ; ce qui procede ſur tout de ce merueilleux rayons, dont elle eſt enueloppée, qui eſtant eſlancez d’en-haut, diſſipent les nuages eſpais, & les tenebres des vices.

Sa nudité demonſtre le meſme, comme eſtant la marque de ſon innocence, qui n’a pas beſoin de ces ornemens exterieurs, ny de ces vaines parures, dont les perſonnes du monde ont accouſtumé de couurir leurs deffauts. Et quant aux biens qu’elle verſe abondamment, ils apprennent à ceux qui les poſſedent à reconnoiſtre qu’ils viennent de Dieu, puis qu’ils doiuent à ſa ſainte Grace les plus hautes dignitez où ils ſe voyent eſleuez.

D’autres la repreſentent ſous la forme d’vne belle Vierge, qui tourne les yeux vers le Ciel, d’où le Saint Eſprit deſcend ſur elle en forme de Colombe : outre qu’ils luy font tenir d’vne main vn Rameau d’Oliuier, & de l’autre vne Couppe.

Elle regarde le Ciel, pour monſtrer que la Grace nous vient de Dieu, & que pour l’obtenir, il faut neceſſairement que le pecheur ſe conuertiſſe, & qu’il luy demande pardon de ſes fautes. Cette pureté de l’ame, eſt figurée par la Colombe, vray ſymbole du Saint Eſprit, à qui les Theologiens attribuent l’infuſion de la Grace dans nos ames ; Et voilà pourquoy il eſt dit, Qu’elle s’eſpend ſur les creatures, par la pure liberalité de Dieu, & ſans aucuns merites qui ſoient en elles.

Et d’autant que l’Oliuier ſignifie la Paix, le Rameau qu’elle tient eſt vne marque de la tranquillité que ſent le pecheur, apres qu’il s’eſt reconcilié auec Dieu ; Et peut-on bien dire auſſi, Que la Couppe eſt vne figure de cette reconciliation, puiſque celuy qui eſt en la grace de Dieu, gouſte des douceurs infinies, qui luy font perdre entierement la ſoif qu’il auoit auparauant des choſes du monde.