Iconologie (Cesare Ripa, 1643)/I/Grauité
Gravité. LXXIV.
Est vne Dame honorable, veſtuë de pourpre, &
qui porte au col en forme de joyau vne Lettre de
cachet. Son viſage ſe tourne du coſté d’vn Flambeau
allumé, qu’elle tient en ſa main gauche, &
de la droite elle empoigne la teſte d’vne petite Statuë, eſleuée
ſur vn pied-deſtal.
La robe de pourpre luy eſt conuenable, pour eſtre vne marque d’honneur, & de dignité, qui rend plus majeſtueuſe & plus graue la perſonne des grands Princes.
La Lettre ſcellée qu’elle porte penduë au col, eſt comme le Caractere de ſa Nobleſſe, qui la fait paroiſtre plus releuée ; Et le Flambeau qu’elle tient en eſt vn autre de ſon merite, qui ne s’accomodant qu’aux choſes graues & ſerieuſes, ſert de fanal à tout le peuple, & luy donne ſur luy le meſme auantage qu’a le Soleil deſſus les moindres lumieres.