Iconologie (Cesare Ripa, 1643)/I/Mort
Mort. CIII.
Omme on y arriue par diuers moyens, auſſi en peut-on
faire la peinture diuerſe. En celle-cy elle eſt repreſentée par vn ſquelet, couuert d’vn riche manteau
de brocatel, d’autant qu’auecque la meſme main dont elle deſpoüille de leur biens les Grands du monde, elle guerit de
leurs maux les miſerables.
Elle eſt déguiſée d’vn beau maſque, pource qu’elle ne ſe monſtre pas à tous auec vn meſme viſage : car prenant à tout moment autant de formes que les Poëtes en donnent à Prothée, elle eſt douce aux vns, & terrible aux autres ; indifferente aux gens de cœur, & odieuſe aux courages laſches. En vn mot, tels que ſont les hommes en leurs humeurs, tels ils ſe la figurent en leur imagination ; & peut-on bien dire que leurs opinions ſont les maſques de la mort : car comme dans la vie ciuile, la Religion, la Patrie, l’Honneur, & les Intereſts publics, ſont des choſes qui les touchent de fort prés, auſſi n’apprehendent-ils point de s’immoler pour leur deffenſe.
On la pourroit couronner encore d’vne Guirlande de Laurier, pour monſtrer, Que ſon empire eſt vniuerſel ſur tous les hommes : car c’eſt ſa couſtume de traitter également les pauures & les riches, les grands & les petits, les forts & les foibles, les ignorans & les doctes ; De ne ſe laiſſer fléchir, ny par prieres, ny par raiſons ; d’auoir les yeux bandes quand elle décoche ſes fleſches ; de n’eſpargner ny aage, ny condition ; & de ne reſpecter non plus les Sceptres des Princes, que les houlettes des bergers, ce qui ne peut mieux eſtre exprimé que par ces beaux vers du plus ingenieux, & du plus poly de tous nos Poëtes Lyriques, M. de Malherbe.
La Mort d’vn coup fatal toutes choſes moiſſonne,
Et l’arreſt ſouuerain,
Qui veut que ſa rigueur ne connoiſſe perſonne,
Eſt eſcrit en airain.
Le Pauure en ſa cabane, où le chaume le couure
Eſt ſujet à ſes Loix ;
Et la Garde qui veille aux barrieres du Louure
N’en defend point nos Rois.