Iconologie (Cesare Ripa, 1643)/I/Perfection

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 146-151).

Perfection. CXXIIII.

ELle eſt figurée par vne fort belle Dame, veſtuë de gaze d’or, qui a le ſein deſcouuert, & le corps dans le Zodiaque. Pour eſtre plus libre en ſon action, elle a les bras retrouſſez iuſques au coude, & fait vn cercle entier auec vn Compas qu’elle tient de la main gauche.

Son habillement eſt d’or, à cauſe que ce metal eſt le plus parfait de tous : & ſa gorge deſcouuerte, pour ſignifier par là vne des principales parties de la Perfection qui eſt de nourrir autruy, & d’eſtre touſiours preſt à faire du bien à ſon prochain : car aſſeurément c’eſt vne choſe beaucoup plus parfaite de donner que de receuoir ; Et voila pourquoy le Souuerain Createur, qui eſt la Perfection meſme, donne ſans ceſſe, & ne reçoit rien de ſes creatures.

Elle ſe ſert d’vn Compas à faire vn cercle, d’autant que cette Figure eſt la plus parfaite de toutes celles des Mathematiques. Ce que les Anciens vouloient monſtrer, comme le remarque Lib. 39. Pierius, lors qu’apres auoir ſacrifié, ils faiſoient apporter deſſus l’Autel vn grand cercle, qu’ils ſouloient tremper dans le ſang de la victime, auec beaucoup de veneration & de ceremonie : Par où ils marquoient la Perfection, comme par le cercle du Zodiaque, qui en eſt encore le vray ſymbole.