Iconologie (Cesare Ripa, 1643)/I/Sapience Divine
Sapience divine. CXLIX.
Ette Figure de la Sapience Divine eſt preſque
toute tirée des ſainctes Lettres. C’eſt vne Dame
que ſa modeſtie merueilleuſe & ſes regards rendent
venerable. Elle eſt veſtuë de blanc, & ſe tient debout
ſur vne pierre carrée. Elle a pour armes vn Corcelet, &
vn Heaume, dont le Cimier eſt vn Coq ; Vn Eſcu rond en ſa
main droite, auecque la figure du Sainct Eſprit au milieu ; Et
en la gauche le Liure de la Sapience, d’où pendent ſept Sceaux,
auecque l’Agneau Paſchal au deſſus.
Nous la poſons ſur vne pierre carrée, pour monſtrer par là, Qu’elle eſt touſiours ferme & inébranlable en ſes fondemens ; Et luy donnons de plus vne Robe blanche, pource que cette couleur, comme nous auons dit ailleurs, eſt la plus pure de toutes, & par conſequent la plus agreable à Dieu.
Quant à ſes Armes, elles ſont toutes myſtiques ; & comme Cap. 5 dit la Sapience meſme, extremement propres à Dieu, Qui prendra pour Corcelet la Iuſtice, pour Heaume vn Iugement certain ; Et l’Equité pour vn Eſcu impenetrable. Le Corcelet, que les Latins appellent Thorax, paſſoit chez eux pour la principale piece des armes d’vn homme de guerre ; Auſſi eſt-ce luy qui deffend les parties nobles, & qui conuient proprement à la Sapience, d’autant qu’il ſert de rempart à l’eſthomac, où quelques Anciens l’ont placée.
Le Coq qu’elle a pour Cimier, ſignifie l’intelligence & la lumiere raiſonnable, qui ſelon Platon, a ſon ſiege dans la teſte ; C’eſt pourquoy Socrate & Pythagore ont par cét oyſeau myſtiquement entendu noſtre ame, qui ſeule eſt capable d’vne vraye intelligence. Auſſi eſt-il certain que le Coq en a vne bien plus grande que les autres animaux ; Car il connoiſt les Eſtoiles, il regarde le Ciel, il conſidere le cours du Soleil, & par ſon chant annonce le iour. Pour ces merueilleuſes connoiſſances il eſtoit conſacré à Mercure & à Apollon, qui eſtoient les Dieux des Arts les plus recommandables. A quoy l’on peut