Iconologie (Cesare Ripa, 1643)/I/Servitude
Servitvde. CLIV.
Ette ieune Fille deſcheuelée, & qui eſt veſtuë d’vne
Robe courte, & de couleur blanche, eſt l’image de
la Seruitude. Elle a ſur les eſpaules vn peſant Ioug, des
Aiſles aux pieds, & à ſon coſté vne Gruë, qui tient vne pierre.
La Seruitude n’eſt autre choſe qu’vn eſtat de la loy des hommes, par qui, & non par la Nature, vne perſonne eſt ſoubmiſe à l’Empire d’autruy.
On la peint ieune, afin qu’elle en ſupporte mieux le trauail ; Et deſcheuelée, pour monſtrer, Que celuy qui releue d’vn autre, doit eſtre plus ſoigneux du ſeruice de ſon Maiſtre que du i. Polit. ſien propre. Ce qui fait dire au Prince des Philoſophes, Que le ſeruiteur eſt vn inſtrument actif, animé, raiſonnable, qui eſt du tout à vn autre, & nullement à ſoy.
Sa robe blanche ſignifie, Qu’vn seruiteur doit eſtre fidelle ; Et le Ioug de ſes eſpaules, Que le deuoir l’oblige à le porter patiemment, & à ſe mortifier ſans murmure ; Car, comme dit Plaute, In Milit.
En tous euenemens, en tout temps, en tous lieux,
Il doit ſçauoir dompter & ſes mains & ſes yeux.
Son habit court, ſes pieds nuds & aiſlez, & les Eſpines qu’elle foule ſignifient, Qu’encore qu’on ſoit de condition ſeruile, il ne faut pas laiſſer toutesfois de ſe reſoudre à ſouffrir les incommoditez qui s’y rencontrent, & de ioindre la promptitude à la vigilance, qui eſt icy denotée par la Gruë, & recommandée en termes exprés par noſtre Seigneur Ieſus-Chriſt, quand il dit, Que bien-heureux ſont les ſeruiteurs que leur Maiſtre ne treuue point endormis à ſon arrivuée.