Iconologie (Cesare Ripa, 1643)/I/Soing
Soing. CLVI.
Ien qu’il face ordinairement les perſonnes vieilles &
laides, il ne laiſſe pas toutesfois de paroiſtre icy également
agreable pour ſa ieuneſſe & pour ſa beauté. Car
il ne peut de meilleure grace s’eſleuer en haut auecque ſes
aiſles, ny tenir plus adroitement qu’il fait deux Horloges de
ſable, tandis qu’il eſt animé d’vn coſté par le chant du Coq
qui eſt à ſes pieds, & de l’autre par le Soleil qui ſort de
l’onde.
Cette Figure eſt peinte belle, pource que le Soing prend l’Occaſion par les cheueux, & qu’il la retiend auec tout ce qu’elle a de beau & de bon en ſoy.
Par les Aiſles eſt ſignifiée vne extréme viteſſe. A quoy l’on adjouſte deux Horloges, & vn Soleil qui ne ſe laſſe point en ſa courſe ; pour monſtrer, Qu’il ne faut point aller mollement dans le ſoing des affaires, mais s’y porter de bonne façon, & auecque perſeuerance, ſi l’on veut en haſter le ſuccez.
A cette Figure ne s’accomodent pas mal les deux ſuiantes, qui repreſentent le Soing ou la Vigilance par des femmes de meſme nature.
La premiere tient vn Liure en la main droite, & en la gauche vne Houſſine, & vne Lampe allumée, prés de laquelle eſt vne Gruë qui ſe ſouſtient ſur vn pied.
La Vigilance de l’ame eſt icy marquée par le Liure ; pource que par la lecture l’homme ſe rend Vigilant Comme par la Houſſine le corps ſe reueille de ſon aſſoupiſſement.
La Lampe allumée monſtre qu’à la Vigilance appartient le temps le plus conuenable au repos ; A raiſon dequoy les anciens Romains appelloient veilles certaines heures de la nuict, durant leſquelles les ſoldats eſtoient obligez à faire la ſentinelle pour la ſeureté de l’armée. D’ailleurs perſonne n’ignore, Que la Lampe ne ſoit entierement neceſſaire à ceux qui veulent donner à l’eſtude leurs ſoings & leurs veilles. Nous liſons à ce propos, Que Démoſthene interrogé de ce qu’il auoit fait pour ſe rendre ſi excellent Orateur, reſpondit, Qu’il auoit vſé plus d’huile que de vin ; entendant par l’vn la Vigilance attachée aux ſciences, & par l’autre l’aſſoupliſſement qui naiſt des delices.
La ſeconde ſe tient debout auec vne Clochette à la main, & à ſes pieds vn Lyon qui dort les yeux ouuerts.
La Cloche conuient fort bien à la Vigilance, pource qu’elle nous inuite à nous leuer, afin de vacquer à la Penitence, & au ſeruice Diuin.
Quant au Lyon, l’on ſçait à quel poinct il eſt ennemy de la Pareſſe, puis qu’au rapport de Pierius, ſes yeux ne ſont iamais ſi bien ouuerts que lors qu’il repoſe.