Iconologie (Cesare Ripa, 1643)/I/Verité

La bibliothèque libre.


Verité. CLXVI.


CEtte Beauté toute nuë tient de la main droite vn Soleil qu’elle regarde, de la gauche vn Liure ouuert, auec vne branche de Palme ; & ſous l’vn de ſes pieds le Globe du monde.

La Verité eſt vne habitude de l’eſprit, diſpoſée à ne deſguiſer aucunement les choſes, ſoit qu’il en parle, ou qu’il en eſcriue : Car ſans iamais changer de penſée, il ſouſtient aſſeurément ce qui eſt, & nie ce qui n’eſt pas.

Elle eſt peinte nuë, pour monſtrer que la naïſueté luy eſt naturelle, & qu’elle n’a pas beſoin d’explication pour ſe faire entendre.

Pour monſtrer auſſi combien elle cherit la clarté, elle tient & regarde vn Soleil, qui eſt Dieu, ſource de toute lumiere, & la meſme Verité.

Le Liure qu’elle tient ouuert, ſignifie, Que dans les eſcrits des bons Autheurs qui nous apprennent les Sciences, ſe trouue la Verité des choſes : Et la branche de Palme, Que la Verité n’a pas moins de force à ſe roidir contre les efforts qui s’y oppoſent, qu’en a la Palme à ſe releuer, plus l’on eſſaye de l’abattre ; Cont. Timarc. Ce qui fait dire à Eſchines, Qu’vne ſi puiſſante Reyne triomphe de toutes les penſées humaines ; A Bachilides, Eſd. c. 4. Qu’eſtant cette Sapience immortelle à qui rien ne peut reſiſter, elle eſt plus forte par conſequent que toutes les choſes du monde : Auſſi eſt-ce pour la meſme raiſon qu’elle foule vn Globe de l’vn de ſes pieds.