◄ Laisse CCXCIX | Laisse CCC | Laisse CCCI ► |
Cil vient au roi por le comant Naimon.
Le duch Herbert se mist en çenulon
Ausi cum dame quant oit feit mesprison
Ver son mariç e vout querir pardon.
Le roi l’escrie : « Dunt veneç vos, gloton ? »
E cil respont, en plorant a fuison :
« Preneç venjance de nostre mesprison.
— Voir », dit le roi, « nel dites en pardon. »
Il en apelle le aut quens Gueinelon
E Guinimer e Rambal de Soison,
Li quens Hernalt e le sir de Maschon :
« Gardeç cestor ausi come prison,
« Si les meneç droit a mon pavilon ;
« Je lor voidroie rendre ses guïerdon. »
Cil respondent : « Bien le vos garderon. »
Naimes cevalce droit contre Salemon ;
Por maltalent le oit mis a raison :
« Salemon sire, or aveç vestre bon,
« C’oncis avés d’Alemans a fuison.
« Se Deus ce done che nos en retornons
« De cist païs a nostre region,
« Le uns valor e l’autre esaieron,
« Li qual vaut plus, Alemans o Berton ».