| ◄ Laisse CCCCXX | Laisse CCCCXXI | Laisse CCCCXXII ► |
Hestous e dan Gerarz, li ber de Rosilun,
Ont prise porte Vals a Diex benecion ;
La porte ont bien garnie e sus levié le pon ;
Vers la place tot droit cevaucent le troton.
Cels devers porte Lice oïrent la tençon ;
La porte orent overte qe veit vers Aragon
E le pont abasié, dunt furent en fricon.
Par le pont tost lever manderent un garçon ;
Mais Bernars, qi estoit dedans l’arse maison,
Ensi de son agaiz, pungant a esperun,
Brandisant son esplié, covert soz son blazon.
Le pont a trepasiez, a qin pois o qe non ;
Cil qe lever le veult feri de tiel randon
Qe sa lance li fice deci qe le polmon :
Mort l’abati a terre, ainc ni oit confesion.
A l’entrier de la porte a feite arestason
Et a mis a sa boce un graile de haut ton
Por qoi Rollant venist, il et soi compaignon.
E Diex ! por qoi li feit ? c’est sa destruçion,
Car cels qi de la porte garderent le dojon
Laserent desor lui avaler un peron
Q’a poine le poüst un buen destrer Gascon
Treiner a son leisir desor un chareton.
Desor l’acus de l’eume consuirent le baron ;
Unqe ne li fist armes defois ne garisun :
A un colp ont tüez et lui et le varon.
Jameis de son travail n’avra plus gueardon,
Afors qe Diex lui face de ses pechiez pardon.