◄ Laisse CCCCXXXVI | Laisse CCCCXXXVII | Laisse CCCCXXXVIII ► |
Soz son heume tresue por montier l’abatus,
Car son neveu estoit, de sa soror nasus.
Hestous escrie « Lengres ! », dont fu bien securus.
Par devant a la place, a l’entrier dou pertus,
Oit une grant croisie de lances e d’escus ;
Mais tant i fiert Gerarz dou brant Carneficus,
Entre lui les autres q’esprovent lor vertus,
Qe par force mestrent Saracins en reüs ;
Trosqu’en mié de lor place les ont entreseüs.
Remontié ont Hestous, q’il avoient redus.
Pués q’il fu a ceval, al tienp Emenadus
Ne se fu chevalers tant largemant vendus ;
Cui il consuet un colp, ne lor vault fer batus.
Sovant crie : « Saint Jaqes ! or somes al desus ! »
Seignor, dou tot avoient nos Cristïens vencus,
Mais de tote autre part sont Saracins meüs :
A ce que cil entrier ne fust dou tot perdus,
Guerpirent toz les autres, dont furent deceüs,
Car de la gient Rollant sunt a pié desandus,
Quant li quens lor escrie : « Traiez vos tot en sus ;
« Reüsier voi mes homes, dont li cuer ai confus. »
Adonc se fist le seing ou Diex fu suspendus ;
Ja fera il tiel couse qe droit au tems Febus
Seroit grant impossible e miracle tenus.