| ◄ Laisse CCCLXVII | Laisse CCCLXVIII | Laisse CCCLXIX ► |
La ou monta quens Hue ou bon destrer liart
Furent mainz abatuz Paiens et Acopard
E maint buen Cristïens, de jofne e de vellart.
Paiens en heüsent vers els le peior part
Quant Grandonie le roi por esconfiz se part ;
Le brant porte sanglant, ne sanble pais coart.
Malgeris encontra, qi estoit en regart,
Ysorez joste lui et Jonas le veilart,
A .vi.m Espanois a lances et a dart.
Quant il virent Grandonie, si trarent cele part,
E cil les recondut, cui le torner fu tart,
A la bataille pesme, irez come liopart,
Troi rois aveqe lui e Gondoer lo quart,
Que tient Groing e La Stelle, Bors d’Espagne e Sain Mart.
Sor la gient Salemons, cons Huon et Riçart
Esperonent a force cels Paiens de mal art.
Malçeris fu armé et seit desor Broart,
Le destrier ravinos qe li tramist Aefart,
Un parant Falseron por devers Dainesmart ;
Son fiuz aveqe lui, qe se tenra musart
S’ancué non fert d’espee sor Frans et sor Lombart.