◄ Laisse CCCLXXVIII | Laisse CCCLXXIX | Laisse CCCLXXX ► |
Broce rois Balegant soz l’ensaigne porprine.
L’estendart esmoverent dejoste une sapine,
O Machomet fu d’or en bainere sanguine.
En la crüel bataille se fierent por athine :
Ansi rompent la prese com vent unde marine.
Balegant seit el var che Bande la roïne
Li tramist por amor de terre Alexandrine ;
Mult l’amoit de coraje, car estoit sa coisine.
Paumoiant son esplié, feisant chiere lovine,
Si fert en la bataille come lous en gaudine.
Un sodoier encontre, qe fu nez de Mesine ;
Une toise de l’aste i mist por la petrine,
Mort l’abat estenduz aval pance sovine.
« Aragons chevalers ! » crie en lengue Païne,
« Hoi feruns de ces Frans bien greignor disipline
« Ne feit lous de berbis, ce le cuer m’endivine. »
Adonc oisez soner a vos mainte boisine
E d’une part e d’autre feire grant desertine.
Carles cria « Monjoie ! », tient l’espee acerine ;
Cui il conseut un colp, mais n’i vaudra meicine ;
Maintenant stuet morir, n’en puet avoir termine.