◄ Laisse CCCVII | Laisse CCCVIII | Laisse CCCIX ► |
Le roi devalle del belfroi batailer ;
Par tot les host fist banir e crider
Rois, duc e queins e marchis e princer,
Les jantil homes e tot les civaler,
Tot li serjans et ardiç bacaler
Chi desirent honor a conquister.
Ch’a li troi jorn et au quart tot enter
Soient a terme de lor cors aasier,
Li quint aprés se facent bien armer
Cun por combatre quant lor ferunt mester ;
La prime fois ch’il oïront soner
Les olifans, si corent adober ;
A la segunde, soient tuit a destrer ;
Et a la terçe, pres lor confaloner ;
Tuit les archiers e les arbalestrer
Ait un serjant por un escu porter ;
E quant le roi le firont comander,
Soient a terre cil che devront berser.
« A nom Jesu e de sa verjen mer
« E de l’apostre ch’alons por aquiter,
« Voil en tel guise la cité tastoner
« Che honor n’avront cil chi Deus veut amer,
« E Saracin daumaçer e daner. »