| ◄ Laisse CCIV | Laisse CCV | Laisse CCVI ► |
Dolant fu Corsabrin quant vit son frere mort ;
Fieremant le regrete e ses poing en detort
E prie Machomet q’en son ciel le recort
E lui done a vengier li daumaje e li tort.
Lor broce li destrer, qe fu isnel e fort,
E fiert un Bergognon, qe fu syr de Moncort ;
Jamais n’avra s’amie de lui augun deport :
Si li coupe le cief cum fust rame d’un ort.
A l’autre colp ancis Raymonet d’Aiguemort :
Cil tenoit de Marsigle la cité e le port.
Lor a mis nos barons en si greu desconfort
Li plus ardi s’esmaie ; ja se fusent detort
Quand le cosins Hestos, dan Rollant, le secort
O le bier Berençer, qe pros fu et acort ;
E furent troy milers, le confanons detort :
De venir a l’estor ni gardent art ne sort.
Ne le fil Malçeris a celui pont non dort ;
Il a dit a son pere : « D’une rien ben m’acord :
« Se il n’i ont aïe, le feit ert leide et hort.
« Car moi leiseç insir par deleç cil regort :
« Se mestier nos eüst, vos estes nostre esfort ;
« Bien nos veirés aider, de certan le conort. »