◄ Laisse CCVI | Laisse CCVII | Laisse CCVIII ► |
Le fils roys Malgeris a l’estor ariva ;
Le fuans feit torner, si les reconforta.
Por la mort Corsabrin merveilos duel mena
E dist, se ne le venje, petit se prisera.
Molt fu pros Ysorés, nel mescreé vos ça ;
Richemant fu armés, sun destrer randona ;
Bien plus d’un grand arpant en l’estor le porta.
Odelon de Niverse devant lui encontra :
Seneschaus fu au quens qe Milon engendra.
Le ardi Saracins si gran colp i dona
Qe nuls amis q’el ait jamais nel revira :
Ni eschu ni aubers q’il eüst non dura ;
Mort l’abat le Paiens, dont mant François pesa.
« Pampeloine, barons ! » Ysorés s’escria,
E pois sa lance prend, a Trepin se jostra ;
Si le fiert ens l’eschu qe le desarçona.
Quand le voit si armé, son cival aresta,
Croit que est gentil home, retenir le voldra.
Mais Berengier le voit, qe pas nel sofrira :
Por meileu de la prese trestoit s’abandona,
De l’espie d’acer Ysorés asena
Amont desor sun eume, qe luit e verdoia.
Si l’estordi le colp qe sor lui encarga
A poi que la cervele e les oils non vola.
Por desor sun arçons le Paiens s’enclina ;
Dedens une autre prese son destrer le porta.
E Berengier s’areste, departir l’en leisa ;
O mort o pris l’avroit, mais il non le caça ;
Tant ame li arcivesqe de lui non se sevra.
Mout fu gran li travail qe por lui endura ;
Tant i feri dou brand qe l’acer en osca ;
Entor lui feit grant plaçe, un caval i amena ;
E l’arcivesqeve monte, forment le mercia :
Por ce a tiel besoing valt bon ami, qi l’a.