| ◄ Laisse CCVII | Laisse CCVIII | Laisse CCIX ► |
CCVIII[1]
Montés fu l’arcivesqe, q’en gran regard estoit ;
Et Ençeler sperone en la gran prese o voit,
E Belençer o lui, qe pas ne s’en recroit ;
Il n’i a cil d’els dos qe son brand n’i enploit.
Quand Ysorés revient, fier maltalant i croit.
Qi donc veïst les ovres qe le Malfer fesoit :
Sor cors de civaler en perdon ne feroit,
Mais mort o enplaié des arçons le sevroit.
Bien dit a soi meïsme, se longuemant vivroit,
Qe la mort Feregu sor François vengeroit
E sor le cors Rollant, se trover le poroit.
Molt par fu Ysorés buens chevaler a droit ;
Se il creüst Yesus e Machon gerpisoit,
Nus milor chevaler Karlon ni serviroit.