◄ Laisse CCXL | Laisse CCXLI | Laisse CCXLII ► |
« Oiés », dist Carles, « vos qui m’estes d’entor,
« Une proverbe dissoient li ancessor :
« Home qui taise et sofre orguel sa hoisor,
« Si li mete hon sor le chief le raisor,
« Car il subjete liberté et honor.
« Je l’ai ja dit, si le dirai ancor,
« Tant com je vive n’avrai teran seignor :
« Por qoi le die, jel tais por le meilor.
« Sir niés Rolant, grant est vostre valor,
« Mais ne voudroie qe fil de ma seror
« A qui je fais honor de jor en jor...
« Se bien feit ai, non veul estre pejor.
« J’entand qe vos ne autre, grant ni menor,
« De prisoner qui soit pris en estor
« Ne in cité ni in castel ni en bor
« Q’il le mi rande maintenant sens demor ;
« S’il le requiert pués a moi por amor,
« A mon plaisir en serai doneor.
« Fetes qe saige, alés vos e cestor
« A desarmer e sorer le chalor.
— Sir », dist Rolant, « je n’ai trop grant sudor
« Por ces paroles, car il seroit folor ;
« Mais si vos pri por la vostre douçor
« Qe non facés, biaus sir enpereor,
« Rien qui vos tourt ni a moi desenor. »