◄ Laisse CI | Laisse CII | Laisse CIII ► |
Devant la ville qe Naçeron funda,
Sont les barons o gaire d’amor n’a.
L’uns est por Crist, que en la crox pena,
E l’autre por la loi que Machon predica.
Feragu dist qe il demostrera
Par vive force qe Damediex manda
Machon en tere, e quant q’il nos mostra
Fu garisons de cescuns q’el crea.
E Rollant dist que Maufer l’ençegna
Quant il son Diex ne sa loi renoia :
Cristiens fu e predicer ala
La sancte foi que nulle per nen a ;
Maint Saracins coverti e lava,
Car en bien fer le glot mout se pena,
Car le mantel papel avoir quida.
Quant l’apostoile de Rome devia,
Les cardenaus de Machomet pensa
Par le meilor qu’il remanist dela,
Car plus de gient a Diex convertira
E le batisme melz en esanplera :
Un apostoile ferent que Diex ama.
Machon l’oï, maintenent s’aïra,
Par ignorance vers Diex se coroça,
Par cist desdaing al poeple designa
La prime loi, dist qu’il les salvera,
La sant batisme e la loi Diex blasma,
Sa predicance e ses dit trestorna.
Jameis celui que Machon segira
En paradix devant Diex ne sera.
Dist Feragu : « Rollant, entendez ça :
« Chi ces paroles vos dist et araisna
« Fu mentiors, apormain se savra.
« Vos Diex rebaut ne vos an defendra,
« Que ses paroles e ses diz compera,
« Car les Juïf por larons lo prova,
« Entre dos leres en cros le aclava. »
Rollant l’oï, a pué ne forsena ;
Il done un saut e le branz entesa,
Tient Durindart, que vangier se quida ;
Mais le Paiens son fust lui presenta.
Voit le Rollant, Damediex reclama
Contre le fust qe sor lui devala ;
A le retrere le brant d’acier gita
Par si grant force qe tot retintina,
Entre deus bandes le tinel encontra,
Par deus moitez le trence e decopa ;
Le tronchons chiet, dont tot se conforta
Le niés Carlons e Monjoie cria,
E la vertu qe nostre Sir monstra
A celui point docement mercia.